ATAMPASI BOROS, ATAMPASI TINARU

SINTAKSIS ID BOROS KADAZANDUSUN

Hai tambalut om tobpinai ku ngawi toinsanan…

Pounsikou dikoyu tu’ minongoi loyog diti blog ku, aarap oku do nu nopo o suang di pinoilang ku diti nga nakaanu manahak do toilaan kumaa dikoyu toinsanan.. om baino nopo nga popoilang oku kokomoi Sintaksis id Boros Kadazandusun..

Fokus : Nuludan panandatan id pibarasan

Nuut Oponsol : Fokus nopo nuludan panandatan di poilangon ku baino nga nuludan panandatan id pibarasan. Haro po kawagu o nuludan panandatan id ponuatan.

 

Sintaksis nopo diti nga tolid do ilmu i monoriuk do bontuk, struktur om pamansayan do panandatan. Sintaksis nopo diti nga kokomoi do poingkuro o hogot-hogot do uludon gisom do kaasil o panandatan di kirati om koontok o nuludan dau. Tumanud di Nik Safiah Karim (2008). Sintaksis nopo nga gana ilmu i monoriuk do bontuk, struktur om pamansayan toi ko’ konstruksi panandatan. Suai ko ii, tumanud di Abdullah Hassan (2006), sintaksis nopo nga kokomoi poingkuro mongulud do boros gisom kaasil do frasa om poingkuro uludon i frasa gisom kaasil do panandatan.

Id gana Boros Kadazandusun nopo, haro piipiro o kouludan do panandatan. Rati nopo nga haro piipiro o kawo nuludan panandatan. Sundung do ingkaa, koubasanan nopo nga oulud o panandatan masa do kouludan Maan + Subjek + Objek (MSO).

Kanou intangai tokou o pananda kawo panandatan id Boros Kadazandusun

S – Subjek

M – Maan

 O – Objek

A – Adver (Kinoyonon, Rati, Timpu)

Adj - Adjektif

 

Subjek

- Subjek nopo nga konstituon id panandatan i owonsoi mantad frasa ngaran om ponokotulu di papatalang do panandatan

Maan/ Predikat

- Konstituon id panandatan i papatalang do subjek

Objek

- Objek nopo nga bontuk boros ngaran toi ko’ tinimungan boros ngaran di osiliu ponorimo do boros maan transitif.

 

Kanou intangai tokou o kawo nuludan panandatan dii:

 

1. Nuludan MSO (Maan + Subjek + Objek)

Poomitanan

Mangakan oku bosou

(M               S        O)

 

Manandang isio buul

(M                  S     O)

 

2. Nuludan MS (Maan + Subjek)

Poomitanan

Minihad i Rita

(M            S)

 

Balajar i Jai

(M         S)

 

3. Nuludan MSAk (Maan + Subjek + Adverb Kinoyonon)

Poomitanan

Minibok  oku  id Samananjung

(M            S                 Ak)

 

Minimpanau yahai hilo Kundansang

(M                    S               Ak)

 

4. MSMO (Maan + Subjek + Maan + Objek)

Poomitanan

Minihad i Gadi kinokot di tasu.

(M            S          M          O)

 

Minongoi oku pagapan do sada

(M              S        M           O)

 

5. Nuludan MSOO (Maan + Subjek + Objek + Objek)

Poomitanan

  Maganu i taki ku do paa’ di pomosuon

(M               S            O                O)

 

Mongolukug i Jinus do karabau di taki dau.

(M                     S              O               O)

6. Nuludan MSOM (Maan + Subjek + Objek + Maan)

Poomitanan

Sinuhu oku di mongingia mononding

(M           S            O                M)

 

Magangat i Devi di tina dau mimpanau

(M                S          O               M)

 

7. Nuludan AkSAk (Adverb Kinoyonon + Subjek + Adjektif Kinoyonon)

Poomitanan

Hilo i Nora id walai pongusapan

(Ak      S                  Ak)

 

Huudi tapaku id soborong

(Ak        S               Ak)

 

8. Nuludan Adj. S (Adjektif + Subjek)

Poomitanan

Olumis no i Keewon

(Adj                 S)

 

Orangou i Jani

(Adj            S)

 

 

9. Nuludan Adj. SMO (Adjektif + Subjek + Maan + Objek)

Poomitanan

Ounsikou oku do nokoruba di Syed Saddiq

(Adj            S             M                  O)

 

Oondos Yodu tu nokouli i tangaanak dau.

(Adj          S            M                 O)

 

10. Nuludan MSAkO (Maan + Subjek + Adverb Kinoyonon + Objek)

Poomitanan

 Pinoopi ku id Bank i tusin ku

(M           S     Ak          O)

 

Pinataam disio id baang i watu.

(M               S        Ak         O)

 

 Pomolingkuman

Sabaagi pomolingkuman, sintaksis nopo diti nga kokomoi kouludan panandatan. ii nopo nga kokomoi poingkuro o hogot-hogot do uludon gisom kowonsoi do frasa om poingkuro i frasa do wonsoion gisom kowonsoi do panandatan di kirati om otopot o nuludan dau. id Boros Kadazandusun nopo nga haro duo o tinimungan do nuludan panandatan. Ii nopo nga nuludan id pibarasan om nuludan id ponuatan. Sundung do ingkaa, fokus ku nopo id blog ku diti nga nuludan panandatan id pibarasan. Poilangon ku o nuludan panandatan id ponuatan maya blog di sumusuhut. Alansan oku do nakaanu i mamambasa do toilaan kawawagu maya do maklumat di pinoilang ku id blog diti.

Kotoluadan om Pounsikou....... 

 

 

 

Toud Sinukuon

Abdullah Hassan (2006). Sintaksis, Volume 13. Siri Linguistik. Siri pengajaran 

          dan pembelajaran Bahasa Melayu. Akademia.

Kementerian Pendidikan Malaysia. (2008). Puralan Boros Kadazandusun Id Sikul. Bahagian  

          Pembangunan Kurikulum Kementerian Pelajaran Malaysia.

Nik Safiah Karim (2008). Tatabahasa Dewan. Perpustakaan Kuala Lumpur.